آش تدير فحالة ما تقطع الضو؟
خدام ما بيك ما عليك كتصايب فشي حاجة حتا مشى الضو، كتفرج فشي فينال ديال شي كأس، الماتش حماسي بزاف كيجيوك حتال اللقطة المهمة فالماتش و كيتقطع الضو، كتفرج فشي فيلم مدوزينو فشي قناة فالساتيليت كيجيبوك حتال اللقطة ديال البطل غادي يعنق البطلة…….ميييغد مشا الضوو….لحقاش حتا حنا فايتين مقولبين، ارتأينا نكتبو ليكم هاد المقال نشرحو ليكم يا سيادي بعض لحويجات لحماية راسنا و آلاتنا الالكترونية و المنزلية في حالة ما مشى الضو.
أول حاجة كيديرو جميع لمغاربة ملي كيتقطع الضو هي نطلو من الشرجم، واش الضو مقطوع على كاع الدرب ولا غي دارنا، لقينا الضو طافي عند كلشي كنرتاحو (الله على حس التضامن الله) داك الساعة كنجبدو شي شميعات غابرييين فشي قنت و كنعيشو الرومانسية حتا يجيب الله الفرج، أما الا لقينا الضو طافي عندنا غي بوحدنا، داك الساعة كيبدى الشك يدخلنا.
ثاني حاجة، كنمشيو نقلبو لمكانة ديال الضو واش فيها لكورا و لا (لكورا كلمة عامية منحدرة من كلمة le Courant Electrique) لقيناها طايحة نعاودو نطلعوها، فحالة خدمات، داكشي لي بغينا، أما الا فحالة طلعناها و عاود طاحت، خاصك تعرف سيدي أن 99% من الحالات ديال انقطاع التيار الكهربائي ناتجة عن تماس فالاسلاك الكهربائية أو خلل بفشي بولة و لا جهاز منزلي أو الكتروني….نخليو لماكانة طايحة نشعلو المصباح ديال الهاتف ديالنا و ندورو نقلبو غرفة بغرفة البولات و الاشياء الموصلة بالتيار الكهربائي، و منساوش نديرو بالنا مع هاديك الريحة سبيسيال ديال الحراق حتا نعرفو مكمن الخلل و داك الساعة نعاودو نطلعو المكانة بكل شجاعة…. و برافوا على المعلم ديال الدار..
تالث حاجة، من بعد ما درتي هادشي كامل و مجابش الله التيسير فهاد الحالة مع عليك غي تعيط على الطبيب الاخصائي فالاسلاك الكربائية الا و هو التريسان…
بكلافيي : Naoufal Ichou
هذا النص هو مثال لنص يمكن أن يستبدل في نفس المساحة،هذا النص هو مثال لنص يمكن أن يستبدل في نفس المساحة
تحويل كودإخفاء محول الأكواد الإبتساماتإخفاء